{UAH} Munnayuganda eyagenda ku kyeyo bamusibidde e Dubai n’afiirayo-look at this wasted life.
|
12:41 AM |
No comments |
Bya MARTIN NDIJJO
RITAH Nanteza baasoose kumukwata ne bamuggalira mu kkomera e Dubai era eyo gye yafunidde obulwadde obw'amaanyi obwamusse.
Abadde yaakamala omwezi gumu n'ekitundu mu kkomera ly'e Al Barsha ku nkingizzi za Dubai, oluvannyuma lw'okukwatibwa mu kikwekweto ekyakoleddwa poliisi okuyoola bakireereese n'abaayingira eggwanga nga tebalina biwandiiko bituufu.
Kabaka Ronald Mutebi II bwe yabadde aggulawo Olukiiko lwa Buganda olw'omwaka ogwa 23 mu Bulange ku Mmande, yalabudde ku kizibu eky'abawala n'abavubuka abatwalibwa ku kyeyo nga babasuubizza ensimbi eziwera kyokka ne babayingiza mu bintu ebikyamu ebibaviirako n'okufiirwa obulamu.
Nanteza, 28, muwala wa David Kigozi ow'e Misanvu mu Mawogola era abadde yaakamala emyaka ebiri ku kyeyo e Dubai kyokka gyonna agimaliddeko mu mbeera enzibu.
Yasooka kubeera Kabowa mu Kampala era we yapangira eby'okugenda e Dubai nga bamutegeezezza nti asobola okufuna omulimu mu 'Supermarket' nga buli mwezi afuna ddoola 1,000 (mu kiseera kino 3,400,000/- mu za Uganda).
BAAMUKEBEDDE NG'ALINA OLUBUTO
Ku nkomerero y'omwezi oguwedde, ab'ekkomera baamukebedde ne bazuula nti alina olubuto oluto.
Mu nkola y'e Dubai, bwe bakwata omukazi ne bamukebera ng'ali lubuto, bamusiba okutuusa lw'azaala. Kino bakikola okuzuula oba ddala omwana alimu omusaayi gwa munnansi wa United Arab Emirates kubanga abawala bangi olubakwata nga babategeeza nti Munnansi w'e Dubai y'avunaanyizibwa ku lubuto olwo. Kyokka bwe kizuulwa nti omusaayi gwa taata ne maama bonna bagwira ng'omuwala bamutikka ku nnyonyi okubazza ku butaka.
Enkola eno, Nanteza yabadde agimanyi era mukwano gwe Ssanyu Nakanwagi yagambye nti bwe baamutegeezezza nti ali lubuto, omusujja ogwabadde gumuluma ne gweyongera ne gwetabikamu ne puleesa n'atwalibwa mu ddwaaliro eriyitibwa Rashdia Hospital e Dhaira.
Mu ddwaaliro yamazeeyo ennaku ssatu n'afa ku Ssande, olwo ab'amakomera ne balyoka bategeeza ekibiina kya Bannayuganda ababeera e Dubai.
Nakanwagi yagambye nti baagenda bonna ne Nanteza e Dubai mu 2013 wabula ne bafuna ebizibu ng'emirimu gye baali basuubira tebagifunye.
Poliisi yatandika okubayigga kubanga ebiwandiiko bye baali bagendeddeko byali tebibasobozesa kukolera Dubai, era Nakanwagi n'akwatibwa nga baakamalayo emyezi etaano gyokka.
Nakanwagi baamusiba era oluvannyuma ne bamutikka ku nnyonyi ne bamuzza mu Uganda olwo ne basigala nga bawuliziganyiza ku ssimu.
Nakanwagi mu kiseera kino ali South Sudan era yatutegeezezza nti Nanteza yakolako obwa 'Hawusigaalo', kyokka embeera n'ekaluba era baamukutte anoonya mulimu mulala.
OMULAMBO GULEMEDDEYO
Andrew Yiga, Munnayuganda ali e Dubai, yategeezezza Bukedde nti okuva ku Ssande lwe baababikidde munnaabwe, bali mu kiyongobero.
Ekyongedde okubakwasa ennaku kwe kuba nga gavumenti ya United Arab Emirates yabalekedde n'obuvunaanyizibwa ku mulambo. Yagambye nti bagezezzaako okwesondamu ssente okukomyawo omulambo ku butaka kyokka zikyagaanye kubanga kkampuni enziisi yababalidde ddoola omutwalo mulamba (mu za Uganda obukadde 34) okukola ku by'okugukomyawo okugutuusa ku kisaawe e Ntebe.
Yiga yasabye abasobola okubayambako mu nteekateeka z'okuzza omulambo babayambeko kubanga kkampuni enziisi ekuuma omulambo gwa Nanteza yabawadde ennaku 7 zokka, bwe ziggwaako nga tebasasudde ng'omulambo guzzibwa mu mikono gya gavumenti nga guziikibwa mu limbo z'e Dubai. Yagambye nti lipoota y'abasawo gye baalabyeko eraga nti Nanteza yafudde 'puleesa'. Talina kyabugagga kyonna ky'alese!
Disclaimer:Everyone posting to this Forum bears the sole responsibility for any legal consequences of his or her postings, and hence statements and facts must be presented responsibly. Your continued membership signifies that you agree to this disclaimer and pledge to abide by our Rules and Guidelines.To unsubscribe from this group, send email to: ugandans-at-heart+unsubscribe@googlegroups.com or Abbey Semuwemba at: abbeysemuwemba@gmail.com.
0 comments:
Post a Comment