{UAH} B L B bayise bayinvesita bakulaakulanye ettaka mu Buganda

B L B bayise bayinvesita bakulaakulanye ettaka mu Buganda

MENGO Ab'ekitongole ekivunaanyizibwa ku ttaka n'ebizimbe ekya Buganda Land Board (BLB) bategeka okukwatagana ne bamusigansimbi bazimbe ebizimbe ebyobuwangaazi n'okutandikawo  pulojekiti endala ku ttaka ly'Obwakabaka mu nteekateeka egenderera okutumbula enkulaakulana n'okufunira abantu ba Kabaka emirimu. Bino bimu ku byatuukiddwako mu lukuŋŋaana lw'ebyobusuubuzi olwomulundi ogwokusatu olwetabiddwamu ne bannayuganda e Bungereza e Troxy Arena mu kibuga London. Lwagguddwawo amyuka Pulezidenti, Edward Kiwanuka Ssekandi Akulira ekitongole kya BLB, Omuk. Kyewalabye Male ye yakulembeddemu ekibinja ky'abakungu abaavudde e Mengo omwabadde akulira ekirabirira bizinensi z'Obwakabaka, Roland Ssebuwufu, Daniella Nakayenga ne Margaret Miiro. Omuk. Male yasinzidde mu lukuŋŋaana luno n'agamba nti mu BLB balina obusobozi okuteekerateekera obulungi abantu abali ku ttaka lya Kabaka nga kw'otadde okuzimba ebizimbe ebyobusuubuzi n'ebisulwamu ebiri ku mutindo, n'agumya abalina bannaggagga bakolagane nabo (aba BLB) okubakolera ku nsonga eno. "Temutya kuleeta nsimbi zammwe e Buganda kuba tukizudde nti enteekateeka eno ye yokka ejja okututuusa ku nkulaakulana eya namaddala mu Bwakabaka," Omuk. Male bwe yagumizza bamusigansimbi. Aba BLB era baayolesezza eri bannayuganda abali emitala w'amayanja ebituukiddwako n'okulaga emitendera egigobererwa abasenze okutereeza obusenze ku ttaka lya Kabaka n'oluvannyuma ne batalaaga ebifo ebyenjawulo omwabadde; amasinzizo okuli; Liberty Christian Fellowship, Uganda Muslim Community, Pollards Hill Mosque, North London Seventh Day Adventist Luganda Church, Ekkanisa y'Oluganda eya St. Jude & St. Aidan Church,  East London, Uganda Martyrs Catholic Community, St. Gabriel's Church n'ekibiina kya Uganda Community in Manchester wamu ne Bakyagalanyi Group. Olukuŋŋaana lwetabiddwamu abakungu omwabadde; Sipiika wa palamenti, Rebecca Kadaga, minisita w'obugagga obw'omu ttaka - Irene Muloni, minisita w'obuvubi- Ruth Nankabirwa, Minisita omubeezi ow'ebyamayumba- Sam Engola n'abalala. Enteekateeka eno eddiridde Kabaka okwongera aba BLB obuyinza okulabirira ettaka lyonna gavumenti eya wakati lye yaddiza Mengo mu ndagaano ey'okutuddiza 'Ebyaffe' eyakolebwa wakati wa Kabaka ne Pulezidenti Museveni gye  buvuddeko.   KIVUMBI KENETH