{UAH} READ STORY WITH ENGLISH MIND & VOCAB - SURPRISE Y'LL UNDERSTAND

130 Africa asailam sika idai long Italy

Postim 4 October 2013, 12:12 AEST

Italy i kamapim pinis wanpla dei blong sore bihaen long wanpla bot emi bin pulap long asailam sika blong Africa ibin kapsaet na go insaet long solwara  klostu long ailan blong  Lampedusa.

Sampla pasinjia blong Africa asailam sika bot emi bin kapsaet na go daon long solwara long Italy. (Credit: AFP) 

Despla bot ibin lusim  Libya, na bihaenim solwara em planti tausan pipal blong Africa isave bihaenim blong traem painim ol kantri long Europe we oli ken stap long en.

Angelino Alfano Minista blong intiria blong Italy itok olsem despla birua ibin kamap taem engin blong despla bot ibin stop na wara ibin kapsaet igo insaet long en.

Emi tok sampla pipal insaet long despla bot ibin brukim ol hap laplap na kukim long paia blong traem kisim sampla halvim, tasol paia ibin stat na bagarapim despla bot.

Mr Alfano ibin tokim ol nius laen olsem, "Once the fire started, there was a concern about the boat sinking and everyone moved to one side, causing the boat to go down".

Oli bilip olsem despla bot ibin wok long karim samting olsem 500 pipal, ibin stap long en taem emi bin go insaet long solwara wanpla kilomita longwei long nambis.

Oli kisim na helpim sampla pasinjia, tasol planti moa ibin dai.

Ol otoriti itok oli save olsem 93 pipal idai pinis na oli painim 40 ol narapla i dai insaet long despla bot.

Oli ting tupla meri husat ibin gat bel ibin dai tu wantem tripla pikinini, na planti ol narapla iwok long lus iet.

Photo: Sampla long ol asailam sika husat ino bin dai long birua blong bot blong ol na oli stap long wanpla bot blong ol coastguard long biris long Lampedusa. (Reuters: Nino Randazzo)

Laurens Jolles, wanpla tokman blong  United Nations Refugee Agency long Rome, itok ol Otoriti long Italy iwok long go hed iet long halvim ol pipal long despla bot.

Emi tok olsem "There seems to have been about 500 people onboard which is a huge, huge number, also compared to the last few years".

"I think at the end of the day we might end up with hundreds of persons dead. Only 151 had been saved up to now of the total number of 500.

"They seem to be all Eritreans, and as I said it's ongoing."

Namba blong ol asailam sika bot iwok long go antap.

Ailan blong Lampedusa istap klostu tru long  Africa  na emi longwei liklik long bikples Italy, na olgeta yia planti tausan pipal blong Libya na ol narapla kantri long North Africa isave go kamap long despla ailan.

Tasol planti taem ol bot em oli save karim ol despla pipal isave bungim birua long wonem oli save pulap tru.

Laen  blong United Nations refugee agency itok olsem long 2012 klostu 500 pipal ibin dai taem oli bin ron long ol bot lusim Tunisia blong traem go long Italy.

Italy i mekim pinis bikpla askim igo long  European Union long halvim em wantem despla heve long wonem emi tok olgeta kantri long Union imas halvim long daonim despla heve.

ABC/Reuters

___________________________________

Gwokto La'Kitgum

"Even a small dog can piss on a tall Building", Jim Hightower