{UAH} Munnayuganda abadde ku kyeyo e Japan bamusse!-bazululu ba nambi ne Kintu mudde eka

Munnayuganda abadde ku kyeyo e Japan bamusse!

kampala | Jun 06, 2015

Omugenzi Kulubya eyafiiridde e Japan

• 
  
• 
  
• 
  
• 
  
• 
• 
• 

Bya VIVIEN NAKITENDE  NE BENJAMIN SSEBAGGALA

MUNNAYUGANDA Ronald Kulubya aludde ng'alina enkaayana n'Omujapani gwe yagulako ekibanda ky'emmotoka mu kitundu ky'e Nagoya, Japan attiddwa.

Mu lutalo olwasituse ku kibanda ekyo, poliisi ya Japan yazze n'ekwata Kulubya n'emuyingiza mu mmotoka yaayo; ekyaddiridde kubikira bantu be nti: Omuntu wammwe afudde!

Kulubya abadde amaze emyaka 15 ng'asuubulira Japan era abadde akulaakulanye nga yagula ekibanda kya mmotoka mw'abadde akolera.

Kulubya azaalibwa mu maka g'omugenzi Joseph Mukasa Kulubya e Wakaliga B Lubaga era e Japan abadde akolera mu kabuga Aichi mu kitundu ky'e Nagoya gy'abadde asuubulira emmotoka era y'omu ku babadde baguza Bannayuganda emmotoka ababeera bagenze okusuubula e Japan.

Margaret Nampiima mwannyina w'omugenzi yategeezezza Bukedde nti yasemba okwogera ne Kulubya omwezi oguwedde n'amutegeeza nti yabadde akyalina ebimutawaanya ku kibanda kye eky'emmotoka kye yagula era ng'ayagala asooke abitereeze alyoke akomewo mu Uganda okubalabako.

Kulubya alina oluganda ku mugagga w'e Nalukolongo, Harriet Namyenya gwe battira mu kalina omulambo ne baguziika mu kinaabiro mu February w'omwaka guno.

ABALI E JAPAN BOOGEDDE EBYABADDEWO

Kayita Mugisha abadde abeera n'omugenzi e Nagoya, Japan yategeezezza Bukedde ku ssimu nti Kulubya ekifo w'abadde akolera kibaddeko enkaayana n'Omujapani abadde agamba nti okugula tekwayita mu mateeka.

Omusango gwatwalibwa mu kkooti ento e Nagoya era Omujapani n'agusinga, wabula Kulubya n'ajulira ng'agamba nti waabaddewo kyekubiira mu nsala eyali eweereddwa.

Wadde yabadde ajulidde, Omu¬japani yaleese bawannyondo ba kkooti okumusengula kyokka kino Kulubya n'akiwakanya era ekyaddiridde kanyoolagano.

Awo poliisi we yajjidde n'ekwata Kulubya era Mugisha agamba nti baamututte bamutulugunya nga kisoboka okuba nga ky'ekyamuviiriddeko okufa.

Poliisi mu kumutwala yamutaddeko omusango gw'okukuba omu ku bawannyondo n'amulumya. Nti kino kyaddiridde okuwaanyisiganya ebisongovu wakati wa Kulubya ne wannyondo wabula ebigambo ne byesiba kubanga Kulubya abadde ayogera ananaagira era mu busungu kwe kukwata wannyondo Omujapani n'amusindika eri!

BABANJA POLIISI OMULAMBO

Mugisha yagambye nti bwe baatuuse ku poliisi y'e Chaye eriraanye Aichi ku Mmande abaserikale ne babategeeza nti omuntu waabwe yafudde.

Baategeezezza ekitebe kya Uganda mu Japan ekyabawadde omukungu gwe baagenze naye ku poliisi okunnyonnyolwa engeri gye yafudde n'okukola enteekateeka ezikomyawo omulambo guziikibwe mu Uganda.

Poliisi ya Japan yalemeddeko ng'egamba nti omulambo gulina kwokebwa kyokka Bannayuganda ne beerema nga bagamba nti mu buwangwa bwa Buganda, alina kuziikibwa ku kiggya ky'ekika kye, era ne balemwa okukkaanya.

Mugisha yagambye nti baafunye looya eyatandise okukola ku mpapula ezinaawaliriza poliisi okubawa omulambo gwa Kulubya gukomezebwewo aziikibwe mu kitiibwa.

Yayongeddeko nti Kulubya abadde n'omukyala n'omwana kyokka babeera Bungereza era ng'alina mu¬ganzi we

Omujapani mu kabuga k'e Aichi gwe yafuna nga mukaziw e agenze e London.
Ekitebe kya Uganda e Japan kyategeezezza aboo¬luganda lwa Kulubya nti balina okusooka okuleeta empapula n'ebifaananyi ebiraga nti omuntu eyafudde waabwe, balyoke bannyonnyolwe engeri gye yafudde n'okubawa omulambo gw'omuntu waabwe.

Kulubya y'eyasikira Joseph Mukasa Kulubya era n'addaabiriza ennyumba omwasigala Nnamwandu Christine Kulubya.

--
Disclaimer:Everyone posting to this Forum bears the sole responsibility for any legal consequences of his or her postings, and hence statements and facts must be presented responsibly. Your continued membership signifies that you agree to this disclaimer and pledge to abide by our Rules and Guidelines.To unsubscribe from this group, send email to: ugandans-at-heart+unsubscribe@googlegroups.com or Abbey Semuwemba at: abbeysemuwemba@gmail.com.